15:52, 14 Հնվ 2021
Համայնքներ

Գորիսի համայնքապետ Առուշ Առուշանյանի նկատմամբ քննիչը որպես խափանման միջոց է ընտրել գրավը

Գորիսի համայնքապետ Առուշ Առուշանյանի նկատմամբ քննիչը որպես խափանման միջոց է ընտրել գրավը

Գորիսի համայնքապետ Առուշ Առուշանյանի նկատմամբ քննիչը որպես խափանման միջոց է ընտրել գրավը։ Գրավի չափ է սահմանվել 2 մլն դրամ գրավը։ Այս մասին «Փաստինֆո»-ի հետ զրույցում ասել է պաշտպան Արմեն Մելքոնյանը։

Նշենք, որ Առուշ Առուշանյանը գտնվում է ազատության մեջ, ուստի գրավի գումարը վճարվել է։

Պաշտպանը նշել է, որ այս ընթացքում Առուշանյանի մասնակցությամբ քննչական գործողություններ չեն եղել, միայն խափանման միջոց է ընտրվել։

Ինչպես արդեն հայտնել ենք՝ 2020թ դեկտեմբերի 24-ին Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, մերժել է Առուշ Առուշանյանի նկատմամբ կալանավորումը որպես խափանման միջոց ընտրելու մասին ՔԿ ՀԿԳ պետի տեղակալ Արսեն Գեղամյանի միջնորդությունը՝ կալանավորման հիմքերի բացակայության պատճառով։ Դատախազությունը չի բողոքարկել դատական ակտը եւ քննիչի որոշմամբ գորիսի համայնքապետի նկատմամբ որպես խափանման միջոց է ընտրվել գրավը։

Հիշեցնենք, որ Առուշ Առուշանյանի նկատմամբ քրեական հետապնդումն սկսել է Սյունիքի անվտանգության վերաբերյալ հարցադրումները բարձրացնելուց հետո։

Առուշ Առուշանյանը որպես կամավորական մասնակցել է հայրենիքի սահմանների պաշտպանությանը ու դեմ է եղել Սյունիքի բարձունքները թշնամուն հանձնելու Նիկոլ Փաշինյանի որոշմանը, քանի որ այն վտանգում է սյունեցիների անվտանգությունը: Օրեր շարունակ Սյունիքում տեղի են ունեցել բողոքի ակցիաներ, բայց դիրքերն այդուհանդերձ հանձնվեցին ու արդեն իսկ ապահով չէ Գորիս-Դավիթ Բեկ, Գորիս-Կապան ավտոճանապարհներով երթեւեկությունը: Ի նշան բողոքի սյունեցիները հայտարարել էին, որ Նիկոլ Փաշինյանը բարոյական իրավունք չունի ոտք դնելու Սյունիք։

«Գորիս համայնքի հարգելի բնակիչներ, առավոտյան ժամը 06։00-ին Գ․ Տաթևացու անվան հրապարակից ավտոմեքենաների շարասյունը կմեկնի Սյունիքի դարպասներ՝ արգելելու հայոց հողը օտարող, Սյունիքի երբեմնի անառիկությունը խաթարող «վարչապետի» մուտքը Սյունիքի մարզ։ Բոլոր արժանապատիվ գորիսեցիներին կոչ ենք անում միանալ կամավոր շարժերթին», -դեկտեմբերի 20-ի գիշերը ֆեյսբուքում գրել էր քաղաքապետը, սակայն հենց գիշերը ոստիկանական մեծ խմբեր են ուղարկվել Սյունիք, իսկ քաղաքապետն էլ բերման ենթարկվեց, ապա ձերբակալվել օրենքով սահմանված կարգի խախտմամբ հավաքներ կազմակերպելու փորձի կասկածանքով։


Այդուհանդերձ, սյունեցիները փակել էին դեպի Սյունիք տանող ճանապարհը ու Փաշինյանը ստիպված եղավ ուղղաթիռով գնալ Սիսիան, հանդիպել մի քանի տասնյակ մարդու հետ ու վերադառնալ Երեւան։ Նրան թույլ չտվեցին այցելել Գորիս, Կապան, Մեղրի։

Երեւանի ընդհանուր իրավասության դատարանը դեկտեմբերի 22-ին ոչ իրավաչափ է համարել Առուշ Առուշանյանի ձերբակալությունը ու երեկ երեկոյան նա ազատ է արձակվել ու մինչ ՁՊՎ-ում ձեւակերպում էին Առուշանյանին ազատ արձակելու փաստաթղթերը՝ ՀՀ քննչական կոմիտեն հայտարարեց, թե որոշում է կայացվել Առուշանյանին որպես մեղադրյալ ներգրավելու մասին։

Ըստ այդմ՝ ՔԿ-ն նրան մեղադրում է ՀՀ քրեական օրենսգրքի 308-րդ հոդվածի 1-ին մասով՝ պաշտոնեական լիազորությունները չարաշահելու, 38-188-րդ հոդվածի 3-րդ մասի 1-ին կետով՝ ապօրինի ձեռնարկատիրություն կազմակերպելու, 38-291-րդ հոդվածի 2-րդ մասով՝ ընդերքի պահպանման և օգտագործման կանոնները խախտելու, 34-322-րդ հոդվածի 2-րդ մասով՝ ինքնիրավչության փորձի, որը կատարվել է բռնություն գործադրելով, 113-րդ հոդվածի 2-րդ մասի 3-րդ և 6-րդ կետերով՝ մի խումբ անձանց կամ կազմակերպված խմբի կողմից խուլիգանական դրդումներով առողջությանը միջին ծանրության վնաս պատճառելու և 34-225.1-րդ հոդվածի 1-ին մասով՝ օրենքով սահմանված կարգի խախտմամբ հավաք կազմակերպելու և անցկացնելու փորձի հատկանիշներով։

Բացառությամբ հավաքներ կազմակերպելու փորձի վերաբերյալ քրեական գործի՝ մյուս դրվագներով քննություն արդեն տևական ժամանակ է, կատարվում է ։ Որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն: ՔԿ-ում քննվող քրեական գործերով Առուշանյանը վերջին անգամ հարցաքննվել է շուրջ յոթ ամիս առաջ՝ վկայի կարգավիճակով։

Նմանատիպ նորություններ