17:21, 11 Հլս 2019
Արտաքին քաղաքականություն

Մինսկում կայացել է ԱՊՀ կոռուպցիայի հակազդման միջպետական խորհրդի նիստը. ՀՀ գլխավոր դատախազը հանդես է եկել ելույթով

Մինսկում կայացել է ԱՊՀ կոռուպցիայի հակազդման միջպետական խորհրդի նիստը. ՀՀ գլխավոր դատախազը հանդես է եկել ելույթով

Մինսկում այսօր կայացել է ԱՊՀ կոռուպցիայի հակազդման միջպետական խորհրդի 
նիստը, որին մասնակցել է նաև ՀՀ գլխավոր դատախազ Արթուր Դավթյանի գլխավորած 
պատվիրակությունը:

  Նիստի ընթացքում ի թիվս այլ հարցերի, քննարկվել է ակտիվների վերադարձման 
ոլորտում միջազգային համագործակցության, այդ համատեքստում մասնակից 
երկրների օրենսդրությունները ՄԱԿ-ի կոռուպցիայի դեմ կոնվենցիայի 5-րդ՝ 
«Ակտիվների վերադարձման միջոցների մասին» գլխի ներքո նախատեսված նորմերին 
համապատասխանեցնելու գործընթացին վերաբերող հարցեր: Որոշվել է մասնակից 
երկրների միջև շարունակել այս ուղղությամբ տեղեկատվության ակտիվ 
փոխանակումը՝ շեշտադրումը կատարելով հատկապես ակտիվների վերադարձման 
ոլորտում իրավական փոխօգնության պրակտիկայի բարելավման և արդյունավետության 
բարձրացման կառուցակարգերի վրա:

  Նիստի ընթացքում մասնակից երկրների պատվիրակություններն ներկայացրել են 
կոռուպցիայի հակազդման սեփական փորձը: Այդ շրջանակներում ՀՀ գլխավոր 
դատախազը հանդես է եկել անցած տարվա ընթացքում Հայաստանում կոռուպցիայի դեմ 
պայքարի արդյունավետության բարձրացմանն ուղղված ինստիտուցիոնալ 
բարեփոխումների ռազմավարական առաջնահերթություններին ու հետապնդած 
խնդիրներին, կոռուպցիոն հանցագործությունների բացահայտման, պատճառված 
վնասների վերակագնման ոլորտներում հիմնական արդյունքներին վերաբերող 
ելույթով:

  Արթուր Դավթյանը մասնավորապես նշել է, որ Հայաստանում մեկնարկած 
հակակոռուպցիոն բարեփոխումներն ունեն քննություն բռնելու և երկրի ընդհանուր 
զարգացման, ժողովրդավարացման, պետական կառավարման համակարգի 
թափանցիկության, հաշվետվողականության և արդյունավետության մակարդակի կտրուկ 
բարձրացման լիարժեք մեկնարկային նախադրյալներ, քանի որ դրանք հիմնված են 
դրսևորվող քաղաքական կամքի, հասարակության լիարժեք օժանդակության, իրավապահ 
մարմինների պրոֆեսիոնալիզմի և վճռականության, ինչպես նաև ավելի վաղ 
կոռուպցիայի կանխարգելմանն ուղղված ինստիտուցիոնալ մի շարք կառուցակարգերի՝ 
մասնավորապես ապօրինի հարստացումը քրեականացնելու, հայտարարագիր 
ներկայացնող և նրանց փոխկապակցված անձանց շրջանակներն ընդլայնելու 
իրավական հիմքերի ստեղծման, ազդարարի ինստիտուտի ներդրման վրա: Ըստ գլխավոր 
դատախազի՝ այս բազայի հենքին Հայաստանը ներկայումս հակակոռուպցիոն պայքարի 
արդյունավետության բարձրացումը տեսնում է հանցավոր ծագում ունեցող գույքի 
բռնագրավման, երկրից ապօրինի դուրս բերված ակտիվները վերադարձնելու և 
օրինական տիրապետողին հանձնելու իրավական մեխանիզմների կատարելագործման, 
հակակոռուպցիոն կենտրոնացված մոդելի ստեղծման և այլ կոնցեպտուալ 
ուղղություններով: «Մեր կողմից այս կառուցակարգերի ներդրման հարցում 
դրսևորվում է ընդգծված զգուշավորություն, քանի որ առկա է շատ հստակ 
նախապայման՝ գտնել այնպիսի լուծումներ, որոնք լիարժեքորեն կերաշխավորեն մի 
կողմից սեփականության անձեռնմխելիության և մարդու սեփականության իրավունքի 
պաշտպանության, իսկ մյուս կողմից սոցիալական արդարության վերականգնման 
հանրային շահի բավարարման հավասարակշռությունը»,-հավելել է Արթուր 
Դավթյանը:

  Փոխըմբռնման, վստահության և կառուցողական երխոսության ոգով անցկացված 
Խորհրդի նիստի ընթացքում ընդհանուր առմամբ ընդունվել է 10 որոշում, որոնք 
վերաբերում են ԱՊՀ կոռուպցիայի հակազդման միջպետական խորհրդի կողմից 
ընդունված նախկին որոշումների, հակակոռուպցիոն պայքարում Միջպետական 
խորհրդի մասնակից երկրների համագործակցության կոնցեպցիայի իրականացման 
արդյունքներին, ինչպես նաև հանցավորության դեմ համատեղ միջոցների 
2019-2023թթ. միջպետական ծրագրով առաջիկա մեկ տարվա համար նախատեսված 
միջոցառումներին: Մասնակից երկրների պատվիրակությունների ղեկավարներն 
արդյունավետ են գնահատել նախորդ տարի անցկացված «Միասին ընդդեմ 
կոռուպցիայի» միջազգային երիտասարդական հակակոռուպցիոն մրցույթը, ինչից 
ելնելով որոշվել է այս տարի ևս նման միջոցառում անցկացնել:

  Բարձր գնահատելով ՀՀ գլխավոր դատախազ Արթուր Դավթյանի նախագահությամբ 
նախորդ տարվա ընթացքում Միջպետական խորհրդի գործունեության դինամիկան և 
արդյունավետությունը՝ նիստի ընթացքում սահմանված կարգով նախագահությունը 
փոխանցվել է Բելառուսի Հանրապետությանը:

  Որոշվել է ԱՊՀ կոռուպցիայի հակազդման միջպետական խորհրդի հաջորդ տարվա 
նիստն անցկացնել Ղազախստանի Հանրապետությունում:

  Բելառուս կատարած աշխատանքային այցի շրջանակներում Արթուր Դավթյանը նաև 
երկկողմ հանդիպումներ է ունեցել ԱՊՀ կոռուպցիայի հակազդման միջպետական 
խորհրդի անդամ առանձին երկրների պատվիրակությունների ղեկավարների, գլխավոր 
դատախազների հետ, որոնց ընթացքում քննարկվել են իրավական փոխօգնության և 
այլ ոլորտներում երկկողմ և բազմակողմ համագործակցության ամրապնդմանն 
առնչվող հարցեր:

Նմանատիպ նորություններ

  • 21:48, 16 Հոկ 2019
    Թուրքական երազներ եվ հայկական իրականություն

    Հայաստանի արտգործնախարարությունը դատապարտել է Ադրբեջանի եւ Թուրքիայի նախագահների՝ տարածաշրջանի անվտանգությունը վտանգող՝ խտրական ու ռասիստական հայտարարությունները, որոնք խոչընդոտում են հակամարտությունների խաղաղ կարգավորումը: Բաքվում Իլհամ Ալիեւը հայտարարել էր, թե Զանգեզուրը խանգարում է պանթուրքիզմի ծրագիրը կյանքի կոչելուն: Թուրքիայի նախագահն էլ Ալիեւին երաշխիքներ է տվել. ամեն ինչ անելու են՝ Ադրբեջանի տարածքային ամբողջականության վերականգնման համար:

  • 23:35, 14 Հոկ 2019
    Սիրիա եւ ԼՂ հիմնահարց. ԱԳՆ խոսնակի ասուլիսը

    Հայաստան գալու ցանկություն ունեցող սիրիահայերին այդ երկրում պատրաստ են օգնել մեր դիվանագետները: Արտգործնախարարության խոսնակ Աննա Նաղդալյանն ասել է, ու ավելացրել, որ Սիրիայում մեր դիվանագիտների հետ աշխատում են արտակարգ ռեժիմով:Նաղդալյանը նաև տեղեկացրել է, որ տարածաշրջան եկած ԵԱՀԿ Մինսկի խմբի համանախագահները՝ կայցելեն Արցախ:

  • 21:52, 13 Հոկ 2019
    Խաղաղություն բառը ադրբեջաներեն չի թարգմանվում

    Այս շաբաթ Թուրքմենստանում վարչապետ Փաշինյանը ճաշի սեղանի շուրջ 1,5 ժամ զրուցել է Ադրբեջանի նախագահի հետ, պատմության դասեր տվել Իլհամ Ալիեւին: Կոչ արել՝ չվիրավորել հայ ժողովրդին և ԱՊՀ պետությունների ղեկավարներին: Առաջնորդների հավաքի ժամանակ Ալիևն ասել էր, թե Հայաստանում հերոսացվում է ֆաշիզմը՝ նկատի ունենալով Երևանի կենտրոնում կանգնեցված Գարեգին Նժդեհի արձանը: Փաշինյանի՝ Ալիևի մասին նախկինում արած այն որակումները, թե նա կիրթ մարդ է, ըստ էության ունեցել էին նույն արձագանքը, ինչ այս անգամվա՝ չափազանց կոշտ պատասխանը: Հավանաբար որովհետև խաղաղություն բառը ադրբեջաներեն չի թարգմանվում: Միայն անցնող շաբաթ արցախա-ադրբեջանական շփման գոտում հակառակորդը հրադադարը խախտել է ավելի քան 90 անգամ` 700 կրակոցով: Մեր առաջապահ զորամասերը շարունակում են վստահորեն իրականացնել մարտական խնդիրը:

  • 23:08, 11 Հոկ 2019
    Փաշինյանը հիշեցնում է Ալիևին պատմությունը

    Թուրքմենստանում ԱՊՀ երկրների ղեկավարների հավաքին Հայաստանի վարչապետը կոշտ պատասխանել է Ադրբեջանի նախագահին՝ նրա ելույթը անվանելով հայ ժողովրդի և ԱՊՀ երկրների ղեկավարների նկատմամբ անհարգալից վերաբերմունք: Ադրբեջանի նախագահը ասել էր, թե Հայաստանում հերոսացվում է ֆաշիզմը: Նախկին իշխանությունը Երևանի կենտրոնում կանգնեցրել է Գարեգին Նժդեհի արձանը, և այն կանգուն է մինչև այսօր: Ալիևը դա անվանել է «ցինիկ քայլ»: Հայաստանի վարչապետը հայտարարել է, որ տեղին չի համարում հանդիպման այս ձևաչափն օգտագործել պատմությունն աղավաղելու, կարևոր հանդիպման մթնոլորտը լարելու համար: Ոչ պաշտոնական աղբյուրը հայտնում է, որ այս միջադեպից հետո՝ Նիկոլ Փաշինյանն ու Իլհամ Ալիևը մոտ երկու ժամ առանձանզրույց են ունեցել:

  • 11:15, 10 Հոկ 2019
    Դատապարտում ենք Սիրիայի հյուսիս-արևելքում Թուրքիայի կողմից իրականացվող ռազմական ներխուժումը․ ՀՀ ԱԳՆ

    Հայաստանը կոչ է անում գործադրել գործուն միջազգային ջանքեր այս ռազմական ներխուժումը դադարեցնելու, զանգվածային վայրագությունները կանխելու և Թուրքիային սահմանակից Սիրիայի բնակչությանը պաշտպանելու ուղղությամբ։